Wunpawng Mungdan Shanglawt Hpung (KIO) Ningbaw Ni Democracy Mungkan De Lam Tam Matut Mahkai Shakut Wa Sai.

By G.Zau Seng

1965 ning shaning, nnan daw de No. 2 Brigade Headquarters kaw nna, India Mundan de, Hkamung Bum, Chyau Kang Hkyet lam hku nna Du Kaba Nchyaw Tang, Englik Prat, No. 2 Mungkan Majan, hpyendu usa, India ga e hpyen training sharin la yu sai wa hpe woi ningbaw shangn nna India Mungdan, Democracy mungdan kaba hpe kam hpa nna sa matut mahkai hpang na matu shangun dat sai rai nga ai. India Asuya hpe karum hpyi nna, Wireless matut mahkai hpaji sharin la shangun na matu mung, dakkasu jawng lung yu sai dakkasu jawngma, 

1. Chang Zung Hkaw

2. David Hkang Je Bawk Naw

3. Maran Jarome Gam Hpang, ndai marai (3) hpe mung shalawm dat ai.

India Asuya gaw, matut mahkai galaw na hpe nhkap la ai, wireless sharin ya na matu mung nhkap la ai, Du Kaba N-chyaw Tang hte shi a runner, ntum ma 1 mi India Mungdan kata de lai shang ai hpe mung, rim nna, bai nam lawng hta rawng tawn masai hpe chye lu ai. Kaga arau sa ai ni gaw, lamu ga jarit nlai shang ai, tinang a mungdan jarit kata e dabang jahkrat nna lat nga ai re. Amyu magup Du Kaba Nchyaw Tang kaw, san jinghkum la, Du Kaba Nchyaw Tang shi a tinggyeng labau, India kaw hpyen training sharin wa ai, English Hpyen dap kaw hpyendu galaw wa ai, No. 2 Mungkan majan kaw hpyen du galaw wa ai, yawng tsun dan san matsing la ngut nna, laban bat (2) daram na ai shaloi shapraw dat, wa kau shangun dat masai hte tinang bug a, Ginjaw de bai du wa masai hpe chye lu ai.

          1965 ning April shata, ginhtawng hka kaji ai ten hta Du Kaba Lahtaw Zau tu, dai aten e, GOC DuKaba Lahtaw Zau Seng a lawu hprut, Shanglawt Ningbaw Kaba Malai lit la nga ai wa hte salang Kaba Pungshwi Zau Seng, Shanglawt Ginjaw Ninggawn Amu Madu lit la nga ai yan, Hkamung Bum hkan ai, hka shi hkaraw hkan ai, India Mung jarit Chyau Kang Hkyet de bai rawt sa sai. Ngai hpe rung masha hku woi shalawm sai. Map lamu ga sumla yu nna Chyau Kang hkyet de shading nam dawk, hka shi hkan nna hkawm ra ai. Hka shi langai mi hpe (3) ya tup hkan yang she hka deng htum ai de du ai. India lamu ga jarit, bum tsaw ai wa htum ai, Chyau Kang Hkyet, Chyau Kang Pass de lu du sai. Lamu ga jarit hpun dung bilat pa hta India maga de Hanumarn Woi Sumla kap ai. Bum hkyet kaw nna lwi pru ai hka hpawk ni maga mi de gaw India Mungdan maga de lwi hkrat mat wa ai bum pungding ga jarit rai nga ai.

Dai India lamu ga jarit Chyau Kang Hkyet ginra gaw grai katsi ai hkyen bum lagaw re ai. April, May shata hta hpun jum kaba hte shana wan wut shagrung tawn nna wan makau kaw yup ra ai. Wan wut shaja tawn ai Wan makau kaw rai tim marai langai sha magyi nna yup yang nau kashung ai majaw, nlu yup ai, manang hte arau pawng yup yang she yup lu ai, katsi dik ai ginra re.

Sumpra Bum, Putao mawdaw lam, Sumpyi Yang mare kaw nna, nam dawk, hka shi hkan ai, lam nau tsan ai, laban bat mi daram nam lam hkawm ra ai rai nna, gun ai n-gu jum ni sha ma kau ai hpang, n-gu, shat nlu sha sai. Hkarang shan, nam du sat shan nga, chyahkyi, woi, la-gang gap sha ra sai. Shan hpe shat shatai nna sha ai. Jum mung nlu mat sai majaw, jum nlawm ai, shan shadu sha, ju sha ra ai. Hkarang shan nkam sha wa jang, hka shi hkan nga myek la nna hka kata na nga shan shadu sha, jahkraw nna sha ai. Hka shi hkan nga myek yang, hkying hkum 3,4 myek jang, tinang myek ai nga hpe tinang nhpai dang hkra lu myek ai ginra re ai.

Du Kaba Lahtaw Zau Tu hte Ninggawn Amu Madu Pungshwi Zau Seng yan gaw India Asuya, Kala salang ni hte India lamu ga jarit, nam kata ga jarit ntsa kaw nan law law lang hkrum bawngban ma ai. Lamu ga jarit nam kata kaw nan shata mi daram na hkra sa nga ai. India mung kaw nna KIO Shanglawt Rawt malan hpe karum jaw na mahtai nlu la ai, bai htang wa ra ai lam rai sai.

Ndai zawn, htingbu Democracy mungdan kaba India hpe grai kam kaba hte matut mahkai, karum hpyi lajin sai, rai tim nhkap la ai majaw, Jinghpaw Shanglawt ningbaw ni gaw, kaga mungkan pinra de mung lam tam ra ai wa sai rai nga ai.  Shing rai, 1965 ning hta GOC, Ningbaw Kaba Lahtaw Zau Seng gaw, Underground  masha hku matut hkat nga ai Howa Duwa Ja La hte dai aten Burma Army, War Office kaw Sergiant Clerk galaw nga ai, Jumhpawk Lum Dau yan hpe Thailand Mundan de mayun sa shang nga shangun dat sai hpe chye lu ai. Howa Ja La yan Jumhpawk Lum Dau, Thailand Mungdan kata kaw du nga jang, GOC Ningbaw Kaba Zau Seng gaw, shi nan bai hkan sa wa nna, Thailand mungdan hku maigan, mungkan de matut mahkai lam tam, karum tam na hpe masing jahkrat wa sai rai nga ai. 1965 ning garai nhtum yang Howa Ja La yan Jumhpawk Lum Dau mung, GOC Ningbaw Kaba Zau Seng shi nan mung, Thailand de lu du mat wa masai hpe chye lu ai.
Copy From Kachinnet