1967, Miwa Mungdan Mare Dadu, Peking (Beijing) De Sa Lawm Ai Lam

By G.Zau Seng 

1967 ning, June, July shata hta Myen Mung, Rangoon (Yangon) kaw Myen amyu masha hte Miwa amyu masha nhtuk hkat, gayet hkat manghkang kaba byin wa sai. Myen Mung Asuya mung, Miwa amyu masha lu susahti ni a company ni zing la ai, dum nta dinghput htingra zing la ai, gumhpraw dum hkan bang tawn ai ja gumhpraw ni zing la ai, mungdan kaw nna Miwa amyu masha ni hpe gawt shapraw kau ai lam ni byin wa sai.

Du Kaba Zau Tu gaw dai aten e GOC Ningbaw Kaba Zau Seng a lawu hprut Ningbaw Malai lit la nga ai re hte maren, kaga salang ni hte bawngban dawdan nhtawm, Myen Mung Asuya hte manghkang byin nhtan shai hkat wa ai ginjang hta, Miwa Komyunit Pati, Peking hpe matut mahkai galaw na matu Salang Kaba Maran Brang Seng hpe woi awn shangun nna, dat kasa hpung kaji langai mi hpe Peking de shangun dat sai.

Myen Mung hte myit npyaw hkat, manghkang byin nga ai ten re majaw, lamu ga jarit kaw du ai kaw nna amyu myu jep san sagawn, tsang hte tsang san jep sagawn ai nna Myen Mung Asuya hpe rawt malan ninghkap gasat ai Jinghpaw (Kachin) rawt malan hpung re lam tsun sang lang dan mat wa jang, tsang hte tsang shalai dat ai hte Peking Ginjaw de du mat wa sai lam chye lu ai. Sa matut mahkai da nna, Salang Kaba Maran Brang Seng hpung ni, kabu gara hte Mali Nmai Wa-lawng, Ginjaw kaw grai lawan bai du wa masai hpe chye lu ai.

No. 2 lang Salang Kaba Maran Brang Seng hpe loi mi grau law ai, marai (20) jan hpung kaji langai woi nna Peking de bai sa hkrum shangun dat sai. KIO ningbaw ni law law, Peking de Miwa Mung Komyunit Pati Ginjaw hte sa hkrum nna, mahku mara lam, Myen Asuya hpe rawt malan gasat ai hta Miwa Mung Komyunit Pati kaw nna karum madi shadaw la na matu sa hkrum bawngban mayu ai lam sa jahkrup wa shangun dat ai rai. Miwa Mung Komyunit Pati Ningbaw, Chou-En Lai hte du hkra, hkrum jahkrup da lu, KIO ningbaw ni sa hkrum na matu myit hkrum lam lu la nna awng dang ai hte kabu gara bai du wa masai. Sinat machyu pala dang ai made hpai la wa na matu mung kumhpa karum jaw dat ma ai hpe hpai la du wa masai.

DuKaba Zau Tu hte KIO ningbaw ni Ginjaw Salang uhpung kaba Peking Ginjaw de rawt sa na matu hkyen lajang wa masai. 1967 September shata hta ngai hpe mung No. 2 Brigade Headquarters de lung wa du na matu shaga dat ma ai hte maren, Brigade Headquaters kaw wa du yang, Miwa Mung Peking de sa na matu shalawm ai lam chye lu sai.

Ngai hpe 1966 ning shaning nnan hta e Cadet Officer hte No. 2 Brigade Special Column Commander san da ai hpang shata (2) daram na wa yang 2^nd. Liutenant atsang de arawng aya sharawt ya masai rai nga ai.  1967 ning, September shata, Peking de sa na hta shalawm nhtawm, Lieutenant atsang de aya bai sharawt masai hte Staff Officer tang san masai.

Peking de sa lawm na matu, 2^nd. Lt. Zahkung Ting Ying hpe mung shalawm nna, shi hpe mung Liutenant tsang sharawt dat ya, staff officer tang san dat masai.

Lt. Zahkung Ting Ying an (2) gaw Staff Officer hku hkan sa lawm nna, laika dip ka na typist clerk langai Sirgeant Shanghtin Hting Nan hpe mung shalawm, rung masha anhte (3) hkan lawm na matu lajang masai. 1967 October shata hta, Mali Nmai Wa Lawng, Shingbwi Ga ngu ai kaw nna masha hpyen hpung kaba yawng marai (700) jan daram Miwa Mung de rawt sa wa sai. Shang Ngaw Bum hpe gala lai di mat wa, Nmai Hka Krung de du, Nmai Hka Rap nna, Law Hkawng Ga lahta hku lai, Miwa Mung jarit, Chang Yin Hku ngu ai de, October shata htum de sa du sai. Grai kashung nna hkyen hkrat, gyaw na hkrat, re ai ten ang ai. Nau kashung hpyau ai, bum krin re ai, wan wut na hpun ju na hpun tawng mung nnga ai majaw, kashung nna gying si mat wa ai hpyenla 3,4 nga mat wa sai. Miwa hpyendap ni ndai zawn nau katsi nna hpyenla si mat ai hpe na chye ai hte rau, Miwa Mung kata, Hkudung Kai ngu ai shara kaw na Miwa Hpyendap kaw shang sa nna nga na matu ahkang jaw la nna lakawn ya karum la ma ai. Shanglawt hpyenla ni hpe panep, nba, labu palawng, pasi palawng kaba, baw chyawp kaba, gyepdin, mawza, sabya, wahtu brush, wahtu tsi, yawng htuk jaw nna lakawn la, karum jaw masai. Dai zawn karum la ai lam hte hpawn, Komyunit masa, Mao Ze Dung masa ni hpe mung, aten lu ai made sharin ya wa masai rai nga ai.

Hpyen hpung hpe Hkudung Kai, Miwa Hpyendap kaw tawn da nna, KIO ningbaw dat kasa hpung ni Peking Ginjaw de lai sa wa na matu hkyen lajang ai. KIO Ginjaw Ningbaw ni yawng mung, Komyunit masa, Mao Ze Dong masa hpe aten lu ai made sharin ra ai lam nga ai. Shat malu masha, sha na ten shagu Mao Ze Dong masa shawng sharin, laika buk hkyeng shawng hti ra ai. Mao Ze Dong asak galu na matu shawng jawm jahtau tsun nna she malu masha jawm sha ai. Dai aten e KIO ginjaw kaw na ningbaw ni gaw, Du Kaba Zau Tu, Ninggawn Amu Madu, Salang Kaba Pungshwi Zau Seng, Du Kaba Lama La Ring, Salang Kaba Maran Brang Seng ni lawm ai. Salang Kaba Maran Brang Seng hte Du Kaba Lama La Ring ni hpung hpe Teng Chung myo hku nna Kunming de wa lat nga shangun nhtawm, Du Kaba Zau Tu hte Salang Kaba Pungshwi Zau Seng yan gaw, ngai mung arau hkan lawm nna, Teng Chung, Yin Jiang Pa, Nshawn Pa, hku gala hkrat wa nna, Shweli makau Nawng Tau, lamu ga jarit mare kaw yu wa hkring nga n-htawm, ding da daw, Sam Mung de, no. 1 Brigade, de na, Du Kaba Lahtaw Zau Dan, Du Kaba Mali Zup Zau Mai yan hpe sa shaga woi la ai. Shing rai, yawng gaw Kunming kaw bai wa hkrum zup ai. Dai aten hta, Dingda daw No. 1 Brigade kaw Du Kaba Lamung Tu Jai sin nga nna, Dingdung daw, No.2 Bridage kaw Salang Kaba Lanyaw Zawng Hra sin nga ai.

1967 December shata hta Miwa Mungdan mare daju, Peking kaw, Miwa Mung Komyunit Pati Ginjaw ningbaw, Chu-En Lai hte hkrum ai, Miwa Hpyendap ningbaw ni hte hkrum ai. Myen Mung Komyunit Pati Ningbaw Thakin Ba Thein Tin hte hpung ni hte hkrum ai. Jinghpaw rawt malan hpyen hpung, Du Kaba Lahkum Naw Seng, Myen Mung Komyunit Pati woi awn ai kata shang mat sai hpung ni hte hkrum ai.

KIO uhpung hte ningbaw ni hpe Myen Mung Komyunit Pati a woi awn lam kata e hkap la na matu, jawm tsun shadut ai hkrai byin gai ai aten re ai. Miwa Mungdan kata e Komyunit masa myit rawt dik ai aten 1967 kaw nna Miwa Mung kaw Cultural Revolution ngu nna bai woi galaw hpang wa ai, gram galai lam myit jasat hte arawn alai akyang gram hkat ai ten sat lawat rai nga ai.

KIO Ningbaw ni hku nna, Komyunit masa hkap la lu ai rai tim, Myen Mung Komyunit Pati a kata tsep kawp shang nna, Myen Mung Komyunit Pati a woi awn ai hpe hkap la na matu ngu ai hpe myit nhkrum lu, nhkap la lu ai lam tsun ningdang hkat ai. Miwa hpyendap ningbaw Liu Ning Ii ngu ai wa gaw hpang jahtum e, Kachin ni hpe dai zawn tsun shadut ai gaw, Kachin kaw, kawa law law tu ai, kawa hpun laman mi hpe ra nna tsun shadut ai nre ai, Kachin kaw nlung lung seng pru ai, nlung tawng mi hpe ra nna tsun ai nre ai, Kachin ni hte Myen Mung masha ni lawt lu nna, madu a ahkaw ahkang  hpring tsup nga pra wa lu na matu myit ya nna tsun ai re lam, tsun kamak jaw ai kaw du hkra pawt sai. Peking kaw dai zawn tsun dara hkat, ruk rak hkat nga ai aten, 1968 ning, January shata praw (1) ya, jahpawt nhtoi garai nhtoi yang, KIO ginra, Mung Gu, Hpawng Seng, shara ni de Du Kaba Naw seng woi awn nna, Myen Komyunit hpyendap ni gasat shang wa sai. KIA hpyen dap hte Myen Komyunit Dap, Du Kaba Naw Seng ni a hpyen dap ni gasat hkat hpang wa sai. Peking kaw Miwa Komyunit ningbaw ni hte KIO Ginjaw ningbaw ni tsun jahkrup hkat ai hta mung, hpang jahtum e, KIO ningbaw ni hku nna, tinang a Ginjaw kaw du wa nna zuphpawng wa galaw nhtawm daw dan na, tinang a mungchying masha ni nhkap la yang mung yak na re majaw, mung chying masha hpe mung zuphpawng galaw, tsun hparan dan nna, mung chying masha a myit hkrum dawdan lam ni hpe mung wa galaw nna, Peking Ginjaw de bai shana na ngu ai bawngban myit hkrum hkat nhtawm, 1968 ning February shata hta KIO Ningbaw ni Peking kaw nna nhtang wa sai. KIA hpyen hpung lat nga ai Hkudung Kai Miwa hpyendap kaw, KIO Salang ni hte hpyen hpung ni hpai la wa  na matu dang ai made, sinat laknak machyu pala karum jaw dat ai hpe hpai nna KIO No.2 Brigade Headquarters Ginjaw, Shingbwi Ga kaw wa du sai. 1968 March shata rai sai.

Copy From Kachinnet